هو المفروض الخطوة اللى جاية بعد القناة والإنجاز اللى حصل فى القناة بفلوس الشعب ومجهودهم يحصل فى التعليم لأن التعليم هو مستقبل الدولة وهو الأساس لتقدم البلد وأنا عندى فكرة كدة فى القضاء على الدروس الخصوصية ومافيا الدروس الخصوصية (الفساد المقنن) والنهوض بالمؤسسة التعليمية بس لابد من دعم الحكومة والشعب.
يعنى أنا عندى مثال أختى فى ثالثة إعدادى شهريا بتاخد أكتر من 400 جنيه دروس بس غير المصاريف المواصلات والتعب الصبح مدرسة وبعد الضهر 3 أو 4 دروس وده حال كل الطلاب أنا رأيى إن الفلوس اللى بتندفع فى الدروس دى ممكن ندفع نصها فى المدرسة كل شهر لأن هما أصلا بيندفعوا يبقى يندفعوا فى مستقبل مش فى مجهول ونلغى الدروس الخصوصية دى خالص والطلاب اللى مستواها ضعيف يتعملهم فصول تقوية إعدادها أقل وكل مدرس معاه مجموعة ضعفاء إذا استطاع أن هو يطور منهم يأخد حافز على كده والحكومة تسن قانون قوى لأى مدرس يدى دروس خصوصية وكده المدرسة شهريا يبقى عندها فلوس من الطلاب شهريا وعندها دخل كبير تقدر تصرف منه على تطوير المدرسة وتطوير المدرس وكل مدرس على حسب مجهوده وشرحه واجتهاده قدرة استيعاب الطلبة منوا يا خد راتب أعلى وكده الدولة ترفع إيدها عن صيانة المدارس ورواتب المدرسين اللى هى بالمليارات والدروس الخصوصية اللى هى بردك بالمليارات وتركز الفلوس فى مشاريع أقوى للدولة وده يبقى لفترة محدودة لمدة 5 سنوات مثلا وبعد كدة الدولة ترجع التعليم مجانى تانى بس بعد ما تكون الدولة قويت والمدارس اتحسنت واللى ممعهوش فلوس يدفع كل شهر من الناس الغلابة مع إن حتى الناس الغلابة بيقطع من قوتهم ويدفعوا الدروس الخصوصية.
ممكن ندخل رجال أعمال ومؤسسات خيرية مصرية تدعم جزء من الفلوس دى وفى نفس الوقت ندمج اطفال الشوارع ضمن المنظومة دى بس أطفال الشوارع نبعدهم عن أماكن التكدس يعنى نبعتهم أماكن بعيدة زى الوادى الجديد ومطروح وسيناء بحيث يبقى معملناش تكدس وفى نفس الوقت يعيشوا هناك ولما يخلصوا تعليم يبقوا هما دول الشباب اللى يقدر ينهض بالمناطق دى والمدرسة تعملهم يونى فورم وهدايا تحفيز للطلاب ونشاطات تانية كتير بحيث الطالب يحب المدرسة وبالتالى التعليم كلوا وكل مدرسة مسئولة عن نفسها يعنى أنا مهندس مدنى بشتغل فى مدارس بيبقى فى مدارس محتاجة صيانة وبايظة ويقلك مفيش ميزانية ومدارس تانية مش بايظة أوى ويقلك ميزانيتها جات اشتغل أنا متأكد إن الناس اللى قدرت تجمع عشرات المليارات فى أسبوع فى مشروع قناة السويس هيقدروا يعملوا كل حاجة. تحيا مصر.
محمد طنطاوي - اليوم السابع