الثانويه العامه في ظل النظام الجديد في نقاط
أولا: الثانوية العامة لم يعد بها مكان للطالب الضعيف
زمان كان ممكن الضعيف يدخل ادبى والممتاز يدخل علمى
دالوقتي علمى وادبى محتاجين مجهود كبير جدا جدا جدا.
ثانياً: مش كل الطلاب ضحايا النظام ولكن بعضهم ومع ذلك يرتدى رداء المسكين المظلوم مع أنه هو اللى زنق نفسه في المذاكرة.
ثالثاً: صعب جدا جدا ان طالب يتفوق فى الثانوى دون متابعة ولى الأمر......ولى الأمر أصبح عليه دور كبير جدا جدا جدا على عكس الماضى اللى كان ممكن ولى الأمر ما يعرفش ابنه فى سنة كام.
رابعا: اختيار المدرس موضوع صعب جدا جدا جدا وده أصبح فى كل المهن زى اختيار طبيب لأولادك أو مهندس لبيتك أو حتى سباك أو كهربائي
قلة الضمير أصبحت السمة البارزة لأغلب المهن
تلاقى مدرس مثلاً كاتب أنه بيشتغل مادة ما للثانوية العامة والازهرية والتجارية وتلاقيه على المواقع التعليميه قاعد يسأل عن طريقة امتحان الثانوية التجارية
وتلاقى المدرس بيعلن عن كورس صيفى وقاعد على المواقع لسه بيجمع المادة العلمية.
خامسا: عدد طلاب المدرس الكتير مش شرط لنجاحه لأن لو مدرس بيقبل جميع الطلاب ومش بيمشى أى طالب مقصر فطبيعى يكون عنده اعداد ضخمة ولكن مثل غثاء السيل.
سادسا: المدرس الأفضل هو الأكثر حل الأسئلة والامتحانات مش الاكثر شرحا.
سابعا: وده من وجهة نظري العلمى والادبى بالنسبة لى مش قصة ميول..... الميول ده لما اكون بختار بين سباحة وكرة القدم ولكن استفيد إيه بطالب مهمل وغير منضبط ولكن بيحب الكمياء والفيزياء...طالب زى ده هيتعب أهله وهيعيشهم على أمل أنه يكون دكتور او مهندس
أما لو طالب ملتزم وقادر على الجلوس لساعات طويلة على الكتاب فده سهل جدا مع مدرس كويس يحب المواد العلمية
ثامنا: الثانوية عامة تبدأ من أولى ثانوي مش تضيع أولى وثانية لعب وفجأة تبحث عن التفوق في الصف الثالث الثانوي.
تاسعا: الطالب كثير الغياب كثير الحجج الغير منظم أوعى تنتظر منه مجموع
وعلى مدار خبرتى ما فيش طالب تفوق الا وكان منظم فى كل حاجة على عكس الطالب اللى وقت الامتحان يغيب ويتحجج بانشغاله بمواد أخرى.... الطالب المتفوق بيتعامل مع جميع المواد بنفس الأهمية.
أتمنى أننا نوصل الرساله دى لكل الدفعات القادمه سواء الي داخلين أولي ثانوى او الي داخلين ثانيه او دفعه ثانويه عامه 2023
أ/احمد غازي
