１- من فضلك بلاش تربط فكرة الدرجات العالية بالنجاح في الحياة لأن ببساطة الدراسات والإحصاءات بتقول إن الناس اللي بيطلعوا الاوائل في الثانوية العامة و اللى بيدخلوا كليات القمة مش كلهم بينجحوا بعد كده في الحياة العملية وعلى النقيض الناس اللي ناجحين في الحياة على المستوي العملي ممكن يكونوا مش جايبين درجات عالية في الدراسة ومش معنى الكلام ده التقليل من أهمية الدراسة لأن ببساطة في فرق بين الدرجات العالية في الدراسة وعملية التعلم وإستمرارها بمعني إن ابني ممكن يكون جايب الدرجات النهائية عن طريق الحفظ بدون فهم وفي النهاية بتكون حصيلة التعلم عنده منخفضة وده ممكن يوصل ولادنا لمرحلة إنه بمجرد ما يخلص الامتحانات بينسى كل حاجة لأنه من الأول كان الهدف الدرجات النهائية مش الرغبة في التعلم والإستفادة .
２- من فضلك بلاش ربط فكرة نجاح وتفوق ولادك في المدرسة بنجاحك الشخصي بمعني أن لو ولادي شاطرين ومتفوقين في المدرسة يبقي أنا أب أوأم ناجح ولو مستواهم منخفض يبقي أنا أب أوأم فاشل.
３- لازم نعدل من الطريقة اللي بنوصل بيها لولادنا فكرة التعلم والمذاكرة لولادنا لأن للأسف بيحدث ربط عند ولادنا بين فكرة المذاكرة و كمية كبيرة من المعاناة و الألم وأي شيء عند الإنسان بيتربط بالألم فالمخ لا إراديا بيبدأ يبتعد عنه وأي شيء بيرتبط بالمتعة فالمخ لا إراديا بيبدأ يقرب منه زي اللعب مثلاً عند ولادنا مرتبط بالمتعة وعشان كده بنلاقي الطفل مش طايق يقعد يذاكر خمس دقائق مع إنه ممكن يلعب خمس ساعات من غير تعب وعشان كده مينفعش أبداً إني أضرب ابني عشان يذاكر لأنك كده ربطت المذاكرة في مخ ابنك بالألم وبالتالي الولد بيبعد عنها وعشان كده لازم نربط المذاكرة بالمتعة بمعني إني أربط المذاكرة مثلاً بالمستقبل و الهدف في الحياة وممكن في السن الصغير كمان ندخل الألعاب في المذاكرة عشان تبقى المذاكرة شئ ممتع وممكن في السن الأكبر شوية استخدم القصص والألوان و الرسوم والمسرحيات عشان أوصل المعلومة بشكل ممتع الموضوع محتاج جهد شوية بس صدقني الوقت اللي هتستخدمه في توصيل المعلومة لأبنك بطريقة ممتعة هو نفس الوقت اللي كنت بتضيعه في العصبية والضغط على ابنك عشان يذاكر ده غير طبعاً الفرق في النتيجة النهائية.
４- لازم نوفر لولادنا بيئة هادية للتعلم يعني البيت يكون بيت هادي ولطيف في مودة ورحمة وفكاهة بين أفراد الأسرة لأن ده بيعمل طاقة إيجابية بتشجع الولاد إن هما يذاكروا على عكس جو الشخط والعصبية والتهديد اللي بيكره ولادنا في المذاكرة و البيت.
５- لازم نقلل توقعاتنا من ولادنا بمعني أوضح إني أتقبل نفسياً إن ابني ممكن يكون درجاته مش عالية في الدراسة بمعنى إني أسعى و أعمل اللي عليا مع ابني عشان يتفوق ويجيب أعلى الدرجات ولكن في النهاية مهما كانت النتيجة فأنا متقبلها و متقبل ابني عشان مقللش من ثقته بنفسه ونبدأ مع بعض نشوف الخطأ فين ونعدله.
６- مهم جداً إننا منعودش ولادنا على فكرة إن إحنا اللي نذاكرلهم لازم يتعود من صغره بالتدريج إنه يعتمد على نفسه يعنى أعرفه وأفهمه يعمل ايه وأسيبه ينفذ لوحده ويرجعلي لو في حاجة وقفت معاه بس بالتدريج لحد ما يوصل لمرحلة إنه يذاكر لوحده ويقتصر دوري على الإشراف فقط.
７- مشاركة الأب في المذاكرة لو كان متاح عنده وقت شئ مهم ولو حتي بالتحفيز وتقديم مكافأة عند الانجاز للطفل.
دي كانت بعض النقاط المهمة عشان ولادنا يحبوا المذاكرة وإن شاء الله هنكمل باقي النقاط دمتم في رعاية الله وحفظه.
مع تربيتنا بكرة أحلى
سوزان سمير
